Projektligji “Për shndërrimin, bashkimin dhe ndarjen ndërkufitare të shoqërive tregtare”

Nga: Av. Endrit KAPAJ

Të nderuar,
Duke ju falenderuar dhe shprehur vlerësimin për punën tuaj, lutem, që modestisht, të shpreh komentet me mia sa më poshtë vijon:

Ndonëse projektligji është hartuar me përpikëri dhe synon përafrimin e plotë me acquis të BE-së, disa fusha mund të përfitojnë nga qartësia ose masat shtesë për të rritur efikasitetin dhe mbrojtjen e palëve të interesuara gjatë zbatimit.

1. Përkufizimi i "Shoqëri evropiane" (Neni 3, pika 9):
Në projektligj përcaktohen "shoqëritë evropiane" si shoqëri të regjistruar në një vend që është palë në traktatet e BE-së dhe ZEE-së, kësisoj gjykoj se mund të qartësohet shprehimisht në aktet nënligjore nëse kjo përfshin edhe shoqëri nga vendet e Zonës Ekonomike Evropiane (ZEE) si Norvegjia, Islanda, Lihtenshtejni dhe Zvicra, duke marrë parasysh marrëdhëniet e tyre të ngushta ekonomike me BE-në. Kjo do të parandalonte paqartësitë në zbatim.

2. Specifika e organit të posaçëm negociues për përfaqësimin e punëmarrësve (Neni 7, pika 5 e vijues):
Projektligji parashikon krijimin e një organi të posaçëm negociues për punëmarrësit, ku ndonëse kërkesa është e qartë, aktet nënligjore mund të detajojnë më tej kriteret shteruese se kur kërkohet një organ i tillë, sikurse procedurat e hollësishme për përzgjedhjen ose njohjen e përfaqësuesve të punëmarrësve (veçanërisht në shoqëritë pa sindikata të themeluara), dhe mënyrën e zgjidhjes së mosmarrëveshjeve potenciale lidhur me përfaqësimin ose votimin e punëmarrësve.

3. Raporti i ekspertit të pavarur (neni 8):
Projektligji kërkon raporte të pavarura nga ekspertë të licencuar për të vlerësuar përshtatshmërinë e kompensimit në mjete monetare dhe raportin e këmbimit të aksioneve. Për të siguruar një vlerësim të drejtë, aktet nënligjore duhet të ofrojnë udhëzime më të detajuara mbi:
(i) Metodologjitë specifike të vlerësimit dhe standardet që duhet të përdoren nga ekspertët.
(ii) Fushën dhe ekspertizën e shqyrtimit të ekspertit, veçanërisht në lidhje me vlerësimin e ndikimit tek punëmarrësit dhe masat për kreditorët.
(iii) Kriteret e kualifikimit dhe pavarësisë për këta ekspertë, përtej kërkesave të përgjithshme të licencimit.

4. Forcimi i koordinimit ndërinstitucional:
Projektligji thekson nevojën për koordinim ndërmjet QKB-së, autoriteteve tatimore, doganore, të sigurimeve shoqërore, të punës, Autoritetit të Mbikëqyrjes Financiare (AMF), Bankës së Shqipërisë dhe Autoritetit të Konkurrencës. Për të garantuar një zbatim efikas, mund të sugjerohet krijimi i protokolleve formale të bashkëpunimit, grupeve të punës ndërinstitucionale ose memorandumeve të mirëkuptimit. Këto mekanizma do të siguronin një rrjedhë informacioni pa probleme, zgjidhje të përbashkët të problemeve, veçanërisht për rastet komplekse që përfshijnë shumë organe rregullatore.

5. Mekanizmat e zgjidhjes së mosmarrëveshjeve dhe afatet kohore:
Në projektligj parashikohet e drejta e aksionarëve dhe kreditorëve për t'iu drejtuar gjykatës, megjithatë mund të përcaktohen afate kohore më specifike për proceset e shqyrtimit gjyqësor, veçanërisht për çështje kritike si pezullimi i një shndërrimi apo ndarjeje. Neni 53.4 dhe 53.5 parashikon një afat 30-ditor për zgjidhjen e kërkesave për kompensim shtesë nga aksionarët në ndarje, gjë që është pozitive, megjithatë, një qartësi e ngjashme për mosmarrëveshje të tjera do të rriste efikasitetin dhe sigurinë juridike.