PVKM PËR SHPALLJEN “PEIZAZH I MBROJTUR” TË EKOSISTEMIT UJOR/TOKËSOR “BISHTKAMËZ”

R E P U B L I K A  E  S H Q I P Ë R I S Ë

KËSHILLI I MINISTRAVE

VENDIM

PËR

SHPALLJEN “PEIZAZH I MBROJTUR” TË EKOSISTEMIT UJOR/TOKËSOR “BISHTKAMËZ”

Në mbështetje të nenit 100 të Kushtetutës dhe të pikës 2, të nenit 10, pikës 4 të nenit 12, neni 20 dhe nenit 36 të Ligjit nr. 81/2017 “Për zonat e mbrojtura”, me propozim të ministrit të Turizmit dhe Mjedisit, Këshilli i Ministrave

VENDOSI:

1. Shpalljen “Peizazh i Mbrojtur” (kategoria V e zonave të mbrojtura) të ekosistemit ujor/tokësor “Bishtkamëz”, me sipërfaqe 497.5 ha, sipas hartës bashkëngjitur në Shtojcën 1 dhe sipas kufirit të paraqitur sipas tabelës së koordinatave në Shtojcën 2. Të dy shtojcat janë pjesë e këtij vendimi.

2. Kjo zonë përfshin sipërfaqe me pyje, shkurre, kullota, bujqësore, kënetore, inproduktive, ujore detare si dhe zona urbane. Mbulesa e tokës brenda sipërfaqes së Peizazhit të Mbrojtur “Bishtkamëz”, jepet në Tabelën 1 më poshtë:

Tabela 1. Sipërfaqja e PM - së e përshkruar sipas mbuleses

3. Peizazhi i Mbrojtur “Bishtkamëz” ka një nënzonë ruajtjeje e administrimi, si më poshtë vijon:

a) Nënzona e Përdorimit Tradicional dhe Zhvillimit të Qëndrueshëm, me sipërfaqe 491.5 (katërqind e nëntëdhjetë e një presje pesë) ha, e shënuar në hartë me ZPTQ.

Kjo nënzonë përfshin tokat pyjore, bujqësore e kullotat, dhe territore ujore ku mundësohet vazhdimi i veprimtarive tradicionale si punime për shëndetësimin e pyjeve, aktivitete bujqësore, kullotja, grumbullimi dhe kultivimi i bimëve mjekësore e aromatike, me përdorim të balancuar të tyre dhe nuk lejohen ndërtimet e veprimtaritë ekonomike që shkaktojnë ndryshimin e gjendjes natyrore të ekosistemit natyror.

Në nënzonën e përdorimit tradicional dhe zhvillimit të qëndrueshëm, zbatohet shkalla e dytë e mbrojtjes, që siguron një territor me ndikim të ulët dhe kontroll të veprimtarive ekonomike, sociale, agrobiznesit, argëtuese, sportive e ekoturistike, ndërtimi i infrastrukturës sipas planeve të zhvillimit urban e turistik të miratuar nga Këshilli Kombëtar i Territorit (KKT), të cilat nuk cënojnë integritetin ekologjik të ekosistemit natyror dhe respektojnë funksionet e zonës së mbrojtur, vlerat ekologjike dhe ato të peizazhit natyror e kulturor.

Zonimi dhe sipërfaqet në Peizazhin e Mbrojtur “Bishtkamëz” jepen në Tabelën 2.

Tabela 2. Zonimi i brendshëm i PM-së

4. Aktivitetet shfrytëzuese të burimeve natyrore, të cilat ndodhen brenda territorit të Peizazhit të Mbrojtur dhe që janë pajisur me leje mjedisore dhe/ose vendim të KKT-së, deri në datën e hyrjes në fuqi të këtij vendimi, do të lejohet të vazhdojnë ushtrimin e aktivitetit, nëse përmbushin kushtet e parashikuara nga Ligji nr. 81/2017 “Për zonat e mbrojtura”.

5. Zonat urbane brenda perimetrit të zonave të mbrojtura, të identifikuara në Vendimin nr. 10, datë 28.12.2020 në Këshillin Kombëtar të Territorit, do të jenë pjesë e Planit të Menaxhimit të zonës së mbrojtur, duke u harmonizuar me rregullat e parashikuara nga Planet e Përgjithshme Vendore dhe Planet e detajuara Urbane, të miratuara.

6. Ministria përgjegjëse për zonat e mbrojtura, në bashkëpunim me ministritë e linjës, me bashkitë, me publikun e interesuar, shoqërinë civile dhe me pronarët privatë, pronat e të cilëve shtrihen brenda territorit të zonës së mbrojtur, miraton Planin e Menaxhimit të Peizazhit të Mbrojtur dhe objektivat e ruajtjes së zonës, të hartuar nga specialistët e fushës në bashkëpunim me Agjencinë Kombëtare të Zonave të Mbrojtura brenda dy vitesh, nga data e hyrjes në fuqi të këtij vendimi.

7. Administrata e Zonave të Mbrojtura të Qarkut Durrës kryen funksionet menaxhuese të Peizazhit të Mbrojtur “Bishtkamëz”.

8. Ngarkohet Ministria e Turizmit dhe Mjedisit, Agjencia Kombëtare e Zonave të Mbrojtura dhe organet përkatëse të qeverisjes vendore, për zbatimin e këtij vendimi.

Ky vendim hyn në fuqi menjëherë dhe botohet në Fletoren Zyrtare.

                                                                                                          KRYEMINISTËR

                          EDI RAMA

SHTOJCA 1

SHTOJCA 2