PVKM PËR SHPALLJEN “PARK NATYROR” TË EKOSISTEMIT NATYROR “LIQENI I ULZËS”

R E P U B L I K A  E  S H Q I P Ë R I S Ë

KËSHILLI I MINISTRAVE

VENDIM

PËR

SHPALLJEN “PARK NATYROR” TË EKOSISTEMIT NATYROR

“LIQENI I ULZËS”

Në mbështetje të nenit 100 të Kushtetutës, të pikës 2 të nenit 10, pikës 4 të nenit 12 dhe nenit të Ligjit nr. 81/2017 “Për zonat e mbrojtura”, me propozimin të ministrit të Turizmit dhe Mjedisit, Këshilli i Ministrave

VENDOSI:

1. Shpalljen “Park Natyror” (kategoria e IV e zonave të mbrojtura) të ekosistemit natyror “Liqeni i Ulzës”, me sipërfaqe 4205.15 ha, sipas hartës bashkëngjitur në Shtojcën 1, dhe sipas tabelës së koordinatave në Shtojcën 2, bashkëlidhur këtij vendimi dhe që janë pjesë përbërëse e tij.

2. Kjo zonë përfshin sipërfaqe me pyje, bujqësore, shkurre, inproduktive dhe sipërfaqe ujore. Mbulesa e tokës brenda sipërfaqes së Parkut Natyror “Liqeni i Ulzës”, jepet sipas Tabelës 1, si më poshtë:

Tabela 1. Sipërfaqja e PN-së, e përshkruar sipas mbulesës.

3. Parku Natyror “Liqeni i Ulzës” dhe zona përreth tij, ndahet në dy nënzona ruajtje e administrimi, si më poshtë vijon:

a) Nënzona Qëndrore, me sipërfaqe 1523.25 (një mijë e pesëqind e njëzetë e tre presje njëzetë e pesë) ha, e shënuar në hartë me ZQ.

Kjo nënzonë përfshin habitatet kryesore pyjore, shkurresh dhe përcaktohet si zonë me vlera të larta e të rralla për trashëgiminë natyrore e biodiversitetin dhe në të zbatohet shkalla e më lartë e mbrojtjes, që siguron një territor të pashqetësuar. Në këtë nënzonë lejohen kërkimi shkencor, zhvillimi i veprimtarive ekoturistike të lira në natyrë.

b) Nënzona e Përdorimit Tradicional dhe Zhvillimit të Qëndrueshëm, me sipërfaqe 2681.9 (dy mijë e gjashtëqind e tetëdhjetë e një presje nëntë) ha, e shënuar në hartë me ZPTQ.

Kjo nënzonë përfshin tokat pyjore, bujqësore e kullotat, dhe territore ujore, ku mundësohet vazhdimi i veprimtarive tradicionale si punime për shëndetësimin e pyjeve, aktivitete bujqësore, kullotja, grumbullimi dhe kultivimi i bimëve mjekësore e aromatike, me përdorim të balancuar të tyre dhe nuk lejohen ndërtimet e veprimtaritë ekonomike që shkaktojnë ndryshimin e gjendjes natyrore të ekosistemit natyror.

Në nënzonën e përdorimit tradicional dhe zhvillimit të qëndrueshëm, zbatohet shkalla e dytë e mbrojtjes, që siguron një territor me ndikim të ulët dhe kontroll të veprimtarive ekonomike, sociale, agrobiznesit, argëtuese, sportive e ekoturistike, ndërtimi i infrastrukturës sipas planeve të zhvillimit urban e turistik të miratuar nga Këshilli Kombëtar i Territorit (KKT), të cilat nuk cënojnë integritetin ekologjik të ekosistemit natyror dhe respektojnë funksionet e zonës së mbrojtur, vlerat ekologjike dhe ato të peizazhit natyror e kulturor.

Zonimi dhe sipërfaqet në Parkun Natyror “Liqeni i Ulzës” dhe zonën përreth tij jepen në Tabelën 2.

Tabela 2. Zonimi i brendshëm i PN-së.

4. Aktivitetet shfrytëzuese të burimeve natyrore, të cilat ndodhen brenda territorit të Parkut Natyror dhe që janë pajisur me leje mjedisore dhe/ose vendim të KKT-së deri në datën e hyrjes në fuqi të këtij vendimi, do të lejohet të vazhdojnë ushtrimin e aktivitetit, nëse përmbushin kushtet e parashikuaranga Ligji nr. 81/2017 “Për zonat e mbrojtura”.

5. Zonat urbane brenda perimetrit të zonave të mbrojtura, të identifikuara në Vendimin nr. 10, datë 28.12.2020 në Këshillin Kombëtar të Territorit, do të jenë pjesë e Planit të Menaxhimit të zonës së mbrojtur, duke u harmonizuar me rregullat e parashikuara nga Planet e Përgjithshme Vendore dhe Planet e Detajuara Urbane të miratuara.

6. Ministria përgjegjëse për zonat e mbrojtura, në bashkëpunim me ministritë e linjës, me bashkitë, me publikun e interesuar, shoqërinë civile dhe me pronarët privatë, pronat e të cilëve shtrihen brenda territorit të zonës së mbrojtur, miraton Planin e Menaxhimit të Parkut Natyror dhe objektivat e ruajtjes së zonës, të hartuar nga specialistët e fushës në bashkëpunim me Agjencinë Kombëtare të Zonave të Mbrojtura brenda dy vitesh, nga data e hyrjes në fuqi të këtij vendimi.

7. Administrata e Zonave të Mbrojtura të Qarkut Dibër kryen funksionet menaxhuese të Parkut Natyror “Liqeni i Ulzës” dhe zonës përreth tij.

8. Ngarkohet Ministria e Turizmit dhe Mjedisit, Agjencia Kombëtare të Zonave të Mbrojtura dhe organet përkatëse të qeverisjes vendore për zbatimin e këtij vendimi.

Ky vendim hyn në fuqi menjëherë dhe botohet në Fletoren Zyrtare.

                                                                                                          KRYEMINISTËR

                          EDI RAMA

SHTOJCA 1

SHTOJCA 2