Projektligji "Për disa shtesa dhe ndryshime në ligjin nr. 111/2017 "Për ndihmën juridike të garantuar nga shteti"

Projektligji “Për disa shtesa dhe ndryshime në ligjin nr. 111/2017 ‘Për ndihmën juridike të garantuar nga shteti’”, synon forcimin e sistemit të ndihmës juridike të garantuar nga shteti, rritjen e aksesit real, efektiv dhe të barabartë të individëve në drejtësi, veçanërisht të personave në kushte të pafavorshme ekonomike, sociale ose juridike.

Ligji nr. 111/2017 “Për ndihmën juridike të garantuar nga shteti” ka krijuar bazën ligjore për organizimin, administrimin dhe financimin e ndihmës juridike parësore, ndihmës juridike dytësore, si dhe përjashtimit nga tarifat dhe shpenzimet gjyqësore. Nëpërmjet këtij ligji është synuar garantimi i mbrojtjes së të drejtave themelore të individit dhe i interesave të tij të ligjshëm, duke përcaktuar format, kushtet, procedurat dhe institucionet përgjegjëse për funksionimin e sistemit të ndihmës juridike.

Në këtë kuadër, projektligji synon forcimin e sistemit të ndihmës juridike të garantuar nga shteti, duke adresuar problematikat e evidentuara gjatë zbatimit të ligjit nr. 111/2017 dhe duke përmirësuar aksesin efektiv në drejtësi për kategoritë përfituese, nëpërmjet këtyre ndërhyrjeve kryesore:

• forcimin e rolit të ndihmës juridike në informimin, edukimin ligjor dhe ndërgjegjësimin e publikut mbi të drejtat, detyrimet dhe funksionimin e sistemit të drejtësisë;
• përfshirjen e njësive të vetëqeverisjes vendore si aktorë mbështetës në funksionimin e sistemit të ndihmës juridike, veçanërisht për informimin, referimin dhe bashkërendimin me shërbimet sociale;
• zgjerimin dhe qartësimin e kategorive të veçanta përfituese të ndihmës juridike, duke përfshirë viktimat e formave të ndryshme të dhunës, viktimat e terrorizmit, viktimat e krimit, personat me aftësi të kufizuara, përfituesit e skemave të mbrojtjes sociale, komunitetin rom dhe egjiptian, si dhe sinjalizuesit që raportojnë shkelje të së drejtës së BE-së sipas kuadrit ligjor europian, etj. 

Kontributet në kuadër të procesit të konsultimit dhe përmirësimit të përmbajtjes së projektligjit, do të përcillen nga institucionet e interesuara nëpërmjet postës elektronike drejtuar Ministrisë së Drejtësisë, me anë të regjistrit elektronik në adresën http://www.konsultimipublik.gov.al, në adresën postare të Ministrisë së Drejtësisë “Bulevardi “Zogu I-rë”, Tiranë”, si dhe në adresën e emailit të koordinatorit për konsultimin publik Greis.Como@drejtesia.gov.al.